HARI ENAM, 3 SEPTEMBER 2022

BINTANGOR: Perintah udah ngungkupka agih belanja RM400,000 dikena ngaduka jalai ngelawa Rumah Peter Kilas ditu.

Projek nya deka digaga nengah projek Jalan Perhubungan Desa ari Opis Menteri Pemansang Menua Pesisir (KPLB).

Nerangka pekara tu, Kaban Parlimen Tanjung Manis, Ir Yusuf Abd Wahab madah, agih belanja nya nyengkaum ngaga palan engkah kerita rumah panjai.

“Pengawa ngabas bagi jalai ke deka diaduka udah digaga.

“Tang taja pia, semina beberapa iti endur ba jalai tu deka diaduka kitai lalu endur bukai nganti belanja projek perintah nangkan tu,” pia ku iya madah.

Iya bejaku munyi nya udah enggau peranak rumah Peter Kilas senamrobik beserimbai Program Aram Begempuru Unit Komunikasi Awam Sarawak Begulai Palan Servis N42 Semop enggau SABERKAS Meradong di Rumah Peter Kilas ditu, kena Hari Enam.

Kelimpah ari nya, Ir Yusuf ngarapka rayat Bintangor lebih agi ba Parlimen Tanjung Manis meri sukung ke tegut ngagai sapa-sapa chalun ari Gabungan Parti Sarawak (GPS) maya Pengawa Bepilih Besai (PRU) ke deka datai.

“Kitai ngarapka sukung rayat menua tu ngagai chalun GPS mengkang baka sebedau tu lebih agi PRU deka diatur enda lama agi.

“Kitai deka meda pengari rayat ba Parlimen nambah mayuh ngambika ‘jaku’ nyaris agi didinga,” ku iya madah baru.

Ir Yusuf mega madah, agi mayuh pengawa deka diatu nyengkaum hak Sarawak ngambika menua tu deka mansang baka nengeri bukai di Semenanjung Malaysia. -EDISI UKAS